of heuen he beyng yet in the erthe On another tyme as he was in the couente of hys ordre at naples beyng in the chyrche in deuoute prayers he was enhaunced vp and lyfte vp from the grounde the heyghte of two cubytes and more Thenne a frere that sawe hym was moche abasshed and admeruaylled and after was herde a clere voys of the ymage of the crucyfyxe tofore whome the holy man was torned and made his prayer the whiche voys sayd vnto hym O Thomas thou hast wryton of me what rewarde wylte thou haue for thy labour Saynt thomas answeryd to hym lord I wyl none other rewarde but thy self for he hym selfe wrote in his tyme and made the seruyce and offyce of the precyous sacramente of the aulter and for as moche as on a tyme a questyon was moeuyd emonge the scolyers of parys how the accydens myght by ryght be wythout subgette And herof maad they doubte and determyned all hooly vnto that whyche the gloryous doctour shold saye which thynge he clâ—rely shewyd to them and for soo moche as sayd is that the demaunde or questyon was moouyd of our lord it was gyuen to vnderstonde of the ende of his lyf whyche was nyghe and as he was sente fore of the pope gregory the tenthe he wente by champayne in the royame of cezylle he began to be seek in suche wyse that he loste entyerly his appetyte And in passyng by the abbay called Fosse neuue of the ordre of the Cysteaux He was prayed gretelye of the monkes that it wold please hym to come to theyr abbaye Hys sekenesse beganne for to encreace from day to day And yet notwythstondyng hys maladye he cessyd not to sowe and sprede his holy doctryne of deuyne scrypture and sapyence and thenne he was prayed of the monkes for texpowne to them the canticles And that tyme it happed that in that monasterye was seen a sterre thre dayes tofore his dethe in manere of a sonne wherof they were abasshed what it myght sygnefye but certeyn it sygnefyed that the holy man shold departe out of thys world wythin thre dayes and that apperyd wel for whan the holy man was dede the sterre was nomore seen and it was in the yere of our lord a thousand two hondred foure and fyfty and anone brother raynolde his felawe witnessyd in trouthe parte sayeng and openlye prechyng in thys wyse I frere raynolde haue herde many tymes and now the confessyon of thys gloryous doctour and haue alweye founde hym clene and nette as a chylde of fyue yere of eage For he neuer consented ne had wylle in mortall ne dedely synne and it is not to be forgoten what meruayllous tokenes were shewyd whan the blessyd doctour shold departe out of this world and of the entre of the perdurable felycyte whiche was graunted to hym For a frere moche deuoute sawe in the houre of his dethe the holy doctour redyng in the scole saynt Powle entryng in to hym and saynt Thomas demaunded hym yf he had had good and crewe vnderstondyng in his epystles Thenne saynt poule answerd to hym ye as good as ony creature lyuyng myght haue And aboue that saynt poule sayd to hym I wyl that thou come wyth me and I shal lede the to a place where thou shalte haue of alle thynges more clere vndestondyng and it semyd to the frere that saynt powle drewe saynt Thomas out of the scole by hys cope ¶ Thenne thys frere beganne to crye sayeng Helpe brethern for frere Thomas is taken from vs and by the voys of this frere the other freres awook and demaunded that frere what he had Thenne he tolde to them and expowned thys sayd vysyon and the freres made Inquysycyon of the trouthe and fonde that it was so as the frere had sayd for in the same houre that the fâ—ere had soo cryed the holy doctour departed out of thys world and lyke as he had had in deuyne sapyence and scyence a doctour and techar Ryght so in hys passyng he had a ledar vnto the glorye perdurable and longe after that he was put in his sepulture the monkes doubted that the holy corps shold haue ben taken aweye ageynst their wylle for the gloryous doctoure had commaunded that his body shold be borne to naples for as moche as he was of that place wherfore the monkes translated hys body from one place to another wherfore the pryour of the abbay was in the nyght greuously repreuyd in a vysyon of saynt Thomas The pryour whyche doubted the Iugemente and sentence deuyne commaunded that the body of the saynt shold be remysed in the place that they had taken it fro and assone as the sepulture was openyd there yssued so grete and swete an odour that alle the cloystre was replenysshed therwyth and it semyd not that ony body had ben buryed there but it semed that there had been alle manere of spyces whiche body they fonde alle hoole in alle hys membrys The habyte of his ordre his cope hys scapulayre and cote were all wythout ony euyl corupcyon and the odoure of his precyous bedy and hys habyte were swete smellyng by euydent wytnesse seuen yere after that he was translated and the body was translated al hole Our blessyd lord hath honoured his blessyd saynt with many meruayllous sygnes and myracles by his benefetes and merytes he hath reysed somme fro dethe and somme fro wycked spyrytes fro the puyssaunce of the fende And many from dyuers maladyes haue been broughte to helthe by the grace of god the merytes of this gloryous saynt We rede also that there was a frere moche deuoute called brother alberte which on a day was moche deuoutelye in prayers tofore th aulter of the virgyn marye ij reuerend ê‘sones merueyllously shynyng apperyd to hym that one of tho tweyn was in thabyte of a bysshop thother inâ—thabite of frere prechours which had a crowne on his heed rouÌ„de byset wyth precioê° stones aboute his necke two colyers one of syluer thother of golde And on his breste he had a grete stone which of hys bryghtenesse caste oute many rayes of clerenesse and â—nlumyned alle the chyrche his cope that he had on was ful of precyous stones Hys cote and scapulayr were alle shynynge of whytenesse Whan the frere sawe thys syght he meruaylled moche Thenne he that was in the habyte of a bysshop sayd to hym I am austyn that am sente to the to the ende that I shewe the glorye of brother Thomas of alquyne whyche is in heuen in glorye lyke vnto me But he procedeth me in the ordre of vyrgynyte and I hym in dygnytee pontyfycal Many other sygnes and myracles hath our lord shweyd vnto the honoure and glorye of his gloryous saynt Saynt Thomas Whos merytes be vnto vs aydaunte and helpyng AMEN Thus endeth the lyf of Saint Thomas Dalquyne And here foloweth the lyf of Saynt Gayus THat tyme whan dyoclesyan and maxymy
for to passe And the water of the ryuer aroos and swellyd more and more And the chyld was heuy as leed And alway as he went ferther the water encresed and grewe more And the chyld more and more wexyd heuy in so moche that xpoÌ„fre had grete anguysse and was aferd to be drowned And whan he was escaped with grete payne and passyd the water And sette the chyld a grounde he sayd to the chyld Chylde thou hast put me in grete peryl thou Wayest alle most as I had had alle the world vpon me I myght bere no greter burdon And the childe answerd Crystofre merueyle the nothyng For thou hast not only born alle the world vpon the But thou hast born hym that created made alle the world vpon thy sholdres I am IhÌ„u cryste the kyng to Whom thou seruest in thys werke And bycause that thou knowe that I saye to the trouthe sette thy staf in the erthe by thy hous and thou shalt see to morne that it shalle bere floures and fruyte and anon he vanysshed from his eyen And thenne cristofre sette his staf in therthe and whan he aroos on the morn he fond his staf lyke a palmyer beryng floures leues and dates and thenne Cristofre went in to the cite of lycye and vnderstode not theyr langage Thenne he prayed our lord that he myght vnderstonde them and so he dyd And as he was in this prayer The Iuges supposed that he had be a fool And left hym there And thenne whan cristofre vnderstode the langage He couerd his visage and went to yâ— place Where they marterd crysten men and comforted them in our lord and theÌ„ne the Iuges smote hym in the face and xpoÌ„fer sayd to them If I were not crysten I shold anon auenge myn Iniurye And thenne Cristofre pyiched his rodde in therthe And prayed to our lord that for to conuerte the people it myght bere floures and fruyt and anon it dyd soo And thenne he conuerted viij thousand men and thenne the kyng sent two knyghtes for to fetche hym to the kyng and they fond hym prayeng And durst not telle to hym soo And anon after the kyng sent as many mo And they anon sette them doun for to praye wyth hym And whan xpoÌ„fre aroos he sayde to them What seche ye And whan they sawe hym in the vysage they sayde to hym the kyng hath sent vs that we shold lede the bounden vnto hym And Cristofre sayd to them yf I wold ye shold not lede me to hym bouÌ„den ne vnbounden And they sayd to hym yf thou wylt goo thy waye goo quyt where thou wylt And we shalle say to he kyng that we haue not founde the hit shall not be so sayde he But I shalle goo with you and thenne he conuerted them in the fayth And commaunded them that they shold bynde his hoÌ„des behynd his backe and lede hym so bounden to the kyng and whan the kyng sawe hym he was aferd and fil doun of the siege and his seruauntes lyft hym vp and releuyd hym agayn And thenne the kyng enquyred his name and his contray cristofre said to hym tofore or I was baptised I was named reprobus after I am named xpoÌ„fer tofore baptem a cananee now a cristen man to whom the kyng said thou hast a folissh name that is to wete of crist crucifyed whiche conde not helpe hym self ne may not proffite to the How therfor thou cursid cananyen why wylt thou not do sacrefyse to our goddes to whom cristofre sayd thou art righfully called dagarus for thou art the deth of the world and felaw of the deuyl thy goddes ben made wyth the hondes of men And the kyng sayde to hym thou were norysshed emong wyld bestes therfor thou mayst not say but wyld langage and wordes vnknowen to men And yf thou wylt now doo sacrefyse to the goddes I shalle yeue to the grete yeftes and grete honours and yf not I shalle destroye the and consume by grete paynes and tormentis But for alle thys he wold in no wyse do sacrefyse wherfor he was sent in to pryson And the kyng dyd do behede the other knyghtes that he had sent for hym whom he had conuerted and after thys he sent in to the pryson to Seynt Christofer two fayre wymen of whom that one was named vysena And that other Aquylyne and promysed to them many grete yeftes yf they coude drawe xpoÌ„fer to synne with them And whan xpoÌ„fer sawe that he sette hym doun in prayer And whan he was constrayned by them that enbraced hym to meue he aâ—oos and sayde what seke ye For what cause be ye comen hyther And they whiche were affrayed of his chyere and clerenes of his vysage sayden holy seynt of god haue pite of vs so that we may byleue in that god that thou prechest And whan the kyng herde that He commaunded that they shold be laten out and brought to fore hym to whom he sayde ye be deceyued but I swere to you by my goddes that yf ye doo no sacrefise to my goddes ye shal anon peryssh by euyl deth And they sayde to hym yf thou wylt that we shalle do sacrefyse commaunde that the places may be made clene and that alle the peple may assemble at the temple and whan this was doon they entred in to the temple and toke theyr gyrdles and put them aboute the neckes of theyr goddes And drewe them to therthe and brake them alle in peaces and sayd to them that were there Goo and calle phisiciens and leches for to hele your goddes And thenne by the commaundement of the kyng Aquylyne was honged and a ryght grete and heuy stone was honged at her feet so that her membres were moche despitously broken And whan she was dede and passyd to our lord her suster vicena was cast in to a grete fyre but she yssued out without harme alle hool and thenne he made to smyte of her hede And so suffred deth After this xpoÌ„fer was brought tofore the kyng And the kyng commaunded that he shold be beten with roddes of yron and that there sholde be sette vpon his hode a crosse of yron rede hote and brennyng and thenne after he dyd do make a siege or a stole of yron and made christofer to be bounden theron And after to sette fyre vnder it And caste theryn pytche but the siege or setyl malte like waxe And Christofer yssued out wythout ony harme or hurte And whan the kyng sawe that He commaunded that he shold be bunde to a strong stake and that he shold be thrugh shoten wyth arowes wyth xl knyghtes archers But none of the knyghtes myght attayne hym For the arowes henge in thayer about nyghe hym wythout touchyng Thenne the kyng wende that he had be thrugh shoten wyth the arowes of the knyghtes and adressid hym for to goo to hym And one of the arowes retorned sodenly fro the ayer And smote
saynt Bernard thre thynges ther ben that ordeyne a man ryght well as touchynge hym self and maketh hym holy that is to lyue sobyrly and ryghtful labour and a debonayr wytte And after saynt Bernard eche of these thre is deuyded in to thre that is to lyue sobyrly yf we haue compaynably contynently and humbly Ryghtfull werke is yf he be ryghtfull discrete fruytfull Ryghtfull by good entencion Discrete by mesure and fruytfulle by edyfycacion The wytte is debonayre whan oure fayth feleth god to be souerayne good So that by his puyssaunce we byleue that our Infyrmyte be holpen by his power our ygnoraunce be corrected by his wysedome And that oure wickednes be diffaced by his bounte And thus sayth Bernard In all these thynges was saynt Luke well ordeyned He hadde fyrst sobre lyuynge in treble manere For he lyued contynently ¶ For as saynt Iheromme wytnessith of hym in the prolologue vpon Luke he hadde neuer wyfne chyldren he lyued compaynably that is signefyed of hym where it is sayd of hym and Cleophas in thoppynyon afore sayd Two disciples wente that same day et cetera Felauship is signyfyed in that he saith two disciples that is to saye well manerd Thyrdly he lyued humbly of whiche humylyte is shewed of that he expressyd the name of his felawe Cleophas and spak not of his owne name And after thoppynyon of some Luke named not his name for mekenes Secondly he had ryghtful werke and dede and his werke was ryghtfull by Intencion And that is sygnefyed in his collecte where hit is sayd Carnis mortificacionem ingiter in corpore suo pro tui nominis amore portauit he bare in his body mortificacion of his flesshe for the loue of thy name he was discrete by at temperaunce And therfor he was fygured in the forme of an oxe whiche hath the foote clouen by whiche the vertu of discrecion is expressyd he was also fruytful by edificacion he was soo fruytfull to his neyghbours that he was holden moost dere of all men Wherfor ad Colocenses quarto He was callyd of thoppostle moost derest Luke the leche saleweth yow Thyrdly he had a meke wytte For he byleuyd and confessyd in his gospel god to be soueraynly myghty soueraynly wyse soueraynly good Of two the fyrst it is said in the iiij chappytre They all were abasshed in his doctryne For the word of hym was in his power And of the thirde it appyerith in the xviij chapytre where he saith ther is none good but god allone Fourthly and last he was ryght wel ordeyned as touchyng his offyce the whiche was to wryte the gospel and in this appierith that he was ordeyned by cause that the said gospell is enoblysshed with moche trouthe hit is ful of moche prouffyte hit is embelysshed with moche honeste And auctorysed by grete auctoryte It is fyrste ennoblysshed with moche trouthe For ther ben thre trouthes that is of lyf of ryghtwysnes and of doctryne Trouthe of lyf is concordaunce of the honde to the tongue Trouthe of ryghtwysnes is concordaunce of the sentence to the cause And trouthe of doctryne is concordaunce of the thyng to the vnderstandyng And the gospell is ennoblysshed by this treble veryte And that this treble veryte is shewed in the gospel luke sheweth that Ihesu Cryste had in hym this treble veryte And that he taught it to other and sheweth that god hadde this trouthe by the wytnes of his aduersaryes And that sayth he in the xxvij Chappytre Mayster we knowe well that thou arte trewe and techest and saiste ryghtfully that is the veryte of the doctryne but thow techest in trouthe the way of god that is the trouthe of lyf For good lyf is the waye of god Secondly he sheweth in his Gospelle that Ihesu Criste taught this treble trouthe Fyrste he taught the trouth of lyf the whiche is in kepynge the commaundementes of god wherof hit is sayd thou shalt loue thy lord God Doo that And thou shalt lyue And whanne a pharysee demaunded oure lord what shalle I doo for to possede the euerlastyng lyf· And he sayd knowest thou not the commaundementes Thow shalt not slee thow shalt do no thefte ne thou shalt doo no aduoultry Secondly there is taughte the veryte of doctryne wherfor he sayd to somme that peruertid this trouth the enleuēth chapytre Woo be to yow pharisees that tythe the peple et cetera and passe ouer the Iugement and charite of God Also in the same woo be to yow wysemen of lawe whiche haue taken the keye of scyence Thirdly is taught the trouthe of ryghtwysnes where hit is sayd yelde ye that longeth to themperour And that ye owe to god to god And he seyth the xix Chapytre They that ben myn enemyes and wyl not that I regne vpon them bryng them hether and slee them to fore me And he saithe in the thyrtenthe chapytre where he speketh of the dome that he shal saye to them that ben repreuyd departe fro me ye that haue done wyckednes Secondly his gospel is ful of moche prouffite wherof Powle and hym self wryte that he was a leche or a phisicyen wherfore in his gospel hit is signyfyed that he made redy for vs medycyne moost prouffytable Ther is treble medycyne Curyng preseruyng and amendynge And this treble medycyne sheweth saynt Luke in his gospelle that the leche celestyall hath made redy The medycyn curynge is that whiche cureth the maladye and that is penaunce whiche taketh awey alle maladyes spyrytuell And thys nedycyne sayth he that the celestyall leche hath made redy for vs whan he sayth Hele ye them that be contryte of herte And preche ye to the caytyues the remyssion of synnes And in the fyfthe chapytre he sayth I am not come to calle the Iuste and trewe men but the synners to penaunce ¶ The Medycyne amendyng is that encreaceth helthe And that is the obseruacion of counseylle For good counceyll maketh a man better and more parfyghte This Medecyne sheweth vs the heuenly leche whan he saith in the eyghtenth chapytre Selle all that euer thou hast and gyue to poure men The medecyne preseruatyf is that whiche preserueth fro fallyng And thys is theschewyng of thoccasions to synne and fro euylle companye And this medecyne sheweth to vs the heuenly leche whan he sayth in the twellfth chappytre kepe yow fro the mete of the pharysees there he techeth vs teschewe the companyes of shrewes and euylle men Or it may be sayd that the sayd Gospel is replenysshed with moche prouffyte by cause that all vertue is contyened therin And herof sayth saynt Ambrose luke compryseth in his Gospell alle the vertues of wysedome in hystorye he enseigned the natyuyte whan he shewed thyncarnacion of our lord to haue be made of the hooly ghost But Dauyd enseygned naturell wysedome when he sayd Sende oute the holy ghoost and they shalle be created And whan he enseygned derkenes made in the tyme of the passion of Ihesu Cryst
the organes makyng melodye she sange in hir herte onelye to god sayeng O lord I beseche the that myn herte and body may be vndefowled so that I be not confounded and euery second and thyrd day she fasted commendyng hir self vnto our lord whome she dredde the nyght cam that she shold goo to bedde wyth hir husbond as the custome is and whan they were bothe in theyr chambre allone she sayd to hym in thys manere O my beste belouyd and swete husbond I haue a counceyll to telle the yf so be that thou wylt kepe it secrete and swere that ye shal bewreye it to no man to whom valeryan sayd that he wold gladly promyse and swere neuer to bewreye it and thenne she sayd to hym I haue an aungel that loueth me which euer kepeth my body whether I slepe or wake and yf he may fynde that ye touche my body by vylonye or foule and pollute loue certeynly he shal anone slee you and so shold ye lese the floure of your yongthe and yf soo be that thou loue me in holy loue and clennesse he shall loue the as he loueth me shal shewe to the his grace Thenne valeryan corrected by the wylle of god hauyng drede sayd to hir yf thou wylte that I beleue that thou sayest to me shewe to me that aungel that thou spekest of and yf I fynde verytable that he be the aungel of god I shal do that thou sayest and yf so be that thou loue another man than me I shal slee bothe hym and the with my swerde Cecylle answerd to hym yf thou wylt byleue baptyse the thou shalt wel now see hym goo thenne forth to via appia whiche is thre myle out of this towne and there thou shalt fynde pope urban with poure folkes and telle hym thyse wordes that I haue sayd and whan he hath purged you fro synne by baptesme thenne whan ye come ageyn ye shal see the aungel and forthe wente valeryan and fonde this holy man vrbane lowtyng emonge the buryellys to whom he reported the wordes that cecylle had said and saynt vrbane for ioye gan holde vp his honde and lete the teerys falle out of his eyen and sayd o almyghty god Ihesu crist sower of chaast counceylle and keper of vs alle Receyue the fruyte of the seed that thou hast sowen in cecyllye For lyke a besy bee she seruyth the For the spouse whome she hath taken whyche was lyke a wode lyon She hath sente hym hyther lyke as a meke lambe and wyth that word apperyd sodeynlye an olde man y cladde in whyte clothes holdyng a book wryten wyth letters of golde Whome Valeryan seyng for fere fyl 〈◊〉 to the grounde as he had been deed Whome the olde man reysed and toke vp and redde in this wyse One god one feythe one baptesme One god and fader of alle abouen alle and in vs alle euery where And whan this olde man had redde this he sayd byleuest thou this or dou test thou it say ye or nay Thenne valeryan cryed sayeng ther is no thynge trewer vnder heuen thenne vanysshed this olde man aweye Thenne valeryan receyued baptesme of saynt vrbane and retorned home to saynt cecyllye whome he fonde wythin hir chambre spekyng wyth an aungel and thys aungel had two crownes of roses and lyles which he helde in his honde of whiche he gafe one to cecylle and that other to valeryen sayeng kepe ye thyse crownes wyth an vndefowled and a clene body for I haue brought them to you fro paradyse and they shal neuer fade ne wydder ne lose theyr sauour ne they may not be seen but of theym to whome chastyte pleasyth thou valeryan by cause thou hast vsed prouffytable counceyl demaunde what thou wylt To whom valeryan sayd There is no thynge in thys world to me leuer thenne my brother whome I wold fayne that he myght knowe this veray trouthe wyth me to whome the aungel sayd thy petycyon pleseth our lord and ye bothe shal come to hym by the palme of marterdom and anone tyburce his brother came and entryd in to thys chambre and anone he felte the swete odour of the roses lylyes and meruaylled fro whens it came Thenne valeryan sayd we haue crownes whyche thyn eyen may not see and lyke as by my prayers hast felte the odour of them so yf thou wylt byleue thou shalt see the crownes of roses and lylyes that we haue Thenne cecyllye and valeryan began to preche to tyburcyen of the ioye of heuen and of the foule creaunce of paynyms the abusyon of ydolles and of the paynys of helle whyche the dampned suffre and also they prechyd to hym of the Incarnacion of our lord and of hys passyon and dyd so moche that Tyburcyen was conuerted and baptysed of saynt vrbane and fro than forthon he had so moche grace of god that euery day he sawe aungellys and alle that euer he requyred of our lord be opteyned After almachyus prouoste of rome which put to deth many crysten men herde say that tyburcyen valeryen buryed cristen men that were marterd gafe al their good to pour peple he called them tofore hym after longe dysputacion he commaunded that they shold goo to the statue or ymage of Iubyter for to doo sacrefyse or ellys they shold be byheded as they were ledde they prechyd the feyth of our lord to one called maxyme that they conuerted hym to the cristen feyth they promysed to hym that yf he had veray repentaūce ferme creaūce that he shold see the glorye of heuen which their sowles shold receyue atte hour of their passyons that he hym self shold haue the same yf he wold byleue Thenne maximus gate leue of the tormentours for to haue them home to his hows the sayd maxymus with al his howsholde and alle the tormentours were torned to the feyth thenne came saynt cecyllye thyder with preestys baptysed them and afterward whan the mornyng came saynt cecylye sayd to them Now ye knyghtes of crist caste aweye fro you the werkes of derknes clothe you with the armes of lyght thēne they were ledde four myle out of the towne brought to fore thymage of Iupyter but in no wyse they wold do sacrefyse ne encence to thydolle but humbly with grete deuocion knelyd doun there were byheded saynt cecylye toke their bodyes buryed them thenne maxymus that saw this thyng said that he sawe in the houre of theyr passyon aūgels clere shynynge her sowles ascende in to heuen whyche the aungels bare vp wherfore many were conuerted to the cristen feythe whan almache herde that maxyme was cristened he dyd do bete hym with plommettes of leed so longe tyl be gaue vp hys spyryte deyed whos body Saynt Cecyllye buryed by valeryan and Tyburcyan after almache commaūded that cecylye shold be brought vnto hys presence for to doo sacrefyse to Iubyter