Selected quad for the lemma: nature_n

Word A	Word B	Word C	Word D	Occurrence	Frequency Band	MI	MI Band	Prominent
nature_n	cold_a	hot_a	moist_a	5,424	5	10.2024	5	true

Text snippets containing the quad

ID	Title	Author	Corrected Date of Publication (TCP Date of Publication)	STC	Words	Pages
A18528	The workes of Geffray Chaucer newlye printed, wyth dyuers workes whych were neuer in print before: as in the table more playnly doth appere. Cum priuilegio ad imprimendum solum.; Works	Chaucer, Geoffrey, d. 1400.; Thynne, William, d. 1546.	1542 (1542)	STC 5069; ESTC S107198	1,080,588	770

folkes cryed To be theyr helpe but thus I let her lye And farther in the temple I gan espys That in dispyte of Dyane the chaste Ful many a bowe ybroke hynge on the wal Of maydens such as gon her tymes waste In her seruyce and paynted ouer al Of many a storye of whyche I touche shall A fewe as of Calixte and Athalante and many a maide of which y e name I wāt Semyramus Caudace and Hercules Byblys Dydo Tysbe and Piramus Tristram Isoude Parys and Achilles Heseyne Cleopatre and Troylus Sylla and eke the mother of Romulus All these were paynted on that other syde And al her loue and in what plyte they dide Whan I was comen ayen into the place That I of spake that was so sote grene Forth walked I tho my seluen to solace Tho was I ware where there sate a quene That as of lyght the sōmer sunne shene Passeth the sterre ryght so ouer measure She fayrer was than any creature And in a launde vpon an hyl of floures was sette this noble goddesse Nature Of braūches were her halles her boures I wrought after her crafte and her mesure Ne there nas foule y t cometh of engendrure That there ne were preest in her presence To take her dome and yeue her audience For thys was on saynt Valentynes daye whan euery foule cometh to chese her make Of euery kynde that men thynke may And that so huge a noyse gan they make That erth see and tree and euery lake So ful was that vnneth there was space For me to stande so ful was al the place And right as Alayne in the playnt of kynde Deuyseth Nature of such aray and face In such aray men myght her there fynde Thys noble Empresse ful of al grace Bad euery foule to take her owne place As they were wonte alway fro yere to yere On saynt Valentynes day to standen there That is to say the foules of rauyne were hyghest set and than the foules smale That eaten as that nature wolde enclyne As worme or thynge of which I tel no tale But water foule sat lowest in the dale foules y t liueth be sede sate on they grene And that so many that wōder was to sene There myght men the royal Egle fynde That wyth his sharpe loke perseth the son And other Egles of a lower kynde Of which that clerkes wel deuysen con There was the tyrant with his fethers don And grene I mene y t goshauke y t doth pyne To byrdes for hys outragyous rauyne The gētyl faucō y t with his fete distreyneth The kynges hande the hardy sperhauke eke The quales foe the merlyon that peyneth Hym selfe ful ofte the larke for to seke There was the doue with her eyen meke The ielous swan ayenst his deth y t syngeth The oule eke that of deth the bode bryngeth The crane the geant w t his trompes sowne The thefe the choughe the chateryng pye The scorning Iaye y e Eles foe the herowne The false lapwyng ful of trechery The stare that the counsayle can bewry The tame Ruddocke and the cowarde kyte The Cocke that horiloge is of thorpes lyte The sparow Venus son the nyghtyngale That clepeth forth the fresh leaues newe The swalowe murdrer of the flyes smale That maken hony of floures freshe of hewe The wedded turtel with his herte trewe The pecocke wyth his aūgel fethers bright The Fesaunt scorner of the cocke by nyght The waker gose the cuckowe euer vnkinde The popyngey ful of delycasy The drake stroyer of hys owne kynde The storke wreker of auoutry The hote cormeraunt ful of glotony The rauyn the crow with her voice of care The throstle olde and the frosty feldefare what shulde I say of foules of euery kynde That in thys worlde haue fethers stature Men myght in that place assembled fynde Before that noble goddes of Nature And eche of them dyd hys busy cure Benignely to chese or for to take By her accorde his formell or his make But to the point Nature helde on her honde A formal Egle of shap the gentyllest That euer she amonge her workes fonde The moost benigne and eke the goodlyest In her was euery vertue at his rest So farforth that Nature her self had blisse To loke on her and ofte her becke to kysse Nature the vycar of the almyghty lorde That hote colde heuy lyght moyst drey Hath knytte by euen nombre of accorde In easy voyce began to speke and say Foules take hede of my sentence I pray for your owne ease in fordrīg of your nede As fast as I may speke I wyl me spede Ye know wel how on saint Valentines day By my statute throughe my gouernaunce Ye do chese your makes after flye away with hem as I pricke you wyth pleasaunce But nathlesse as by ryghtful ordinaunce May I not let for al this worlde to wyn But he that most worthyest is shal begyn The tercel Egle as ye knowe ful wele The foule royal aboue you al in degre The wyse worthy the secrete true as stele The whych I haue formed as ye may se In euery parte as it best lyketh me It nedeth not hys shappe you to deuyse He shal fyrst chese and speken in hys gyse And after hym by ordre shal ye chese After your kynde eueryche as you lyketh And as your hap is shal ye wynne or lese But which of you that loue moost entrikith God sende hym her y t sorest for hym siketh And there withal the Tercel gan she cal And sayd my sonne the choyse is to the fal But nathlesse in thys condicion Must be the choyse of euerych that is here That she agree to hys election who so he be that shulde bene her fere Thys is our vsage alway fro yere to yere who so may at this tyme haue his grace In blysful tyme he came into thys place wyth heed enclined with ful humble chere Thys royal Tercell spake taryed nought Vnto my souerayne lady and not my fere I chose chese with wyl herte thought The formel on your hande so well ywrouȝt whose I am al and euer wyl her serue Do what her lust to do me lyue or sterue Besechyng her of mercy and of grace As she that is my lady souerayne Or let me dye here present in thys place For certes longe may I not lyue in payne For in my herte is coruen euery vayne Hauyng regarde onely to my trouth My dere herte haue on my wo some routh And yf I be founde to her vntrewe Dysobeysaunt or wylful negligent A vauntour or in processe loue a newe I pray to you thys be my iugement That wyth these foules I be al to rent That ylke daye that she me euer fynde Vnto her vntrue or in my gylte vnkynde And syth that none loueth her so wel as I Although she neuer of loue me behet Thā ought she be myne through her mercy For other bonde