Selected quad for the lemma: day_n

Word A	Word B	Word C	Word D	Occurrence	Frequency Band	MI	MI Band	Prominent
day_n	friday_n	monday_n	saturday_n	5,830	5	12.1559	5	false

Text snippets containing the quad

ID	Title	Author	Corrected Date of Publication (TCP Date of Publication)	STC	Words	Pages
A14444	Hier begynneth the booke callyd the Myrrour of the worlde ...; Image du monde. English.	Gossuin, of Metz, attributed name.; Caxton, William, ca. 1422-1491.; Vincent, of Beauvais, d. 1264, attributed name.	1490 (1490)	STC 24763; ESTC S109670	102,455	172

this part of a day is sette by cause alleway in iiij yere is a daye cōsumed whiche is aboue in that space the whiche yere is named bysexte or lepe yere whiche in iiij yere falleth ones so is sette fro foure yere to foure yere alway more a daye thēne is the sonne comen agayn in his first poynt And that is in the myd marche whan the newe tyme recomenceth that all thynges drawe to loue by the vertu of the retorne of the sonne for in this season had the world first his begynnyng therfore thenne alle thyng reneweth and cometh in verdure by right nature of the tyme and none otherwyse Aboue the sonne ther be thre sterres clere and shynyng and one aboue another That is to wete mars iupiter saturnus Saturne is hyest of the seuen whiche hath in his cours xxx yere er he hath all goon his cercle thyse iij sterres reteyne their vertues in thynges here bynethe ye may see yf ye beholde this figure how they be in ordre eche aboue other whiche fygure sheweth it well ¶ How the vij planetes gyue the names to the vij dayes Capitulo xxxijo. Thise vij planetes ben suche that they haue power on thinges that growe on therthe haboūde their vertues more than all the other that ben on the firmamēt more appertli werke lyke as thaūciēt sage philosophers haue enserched by their wyttes of thyse vij planetes taken the dayes of the weke their names as ye shal here The mone hath the monday mars the tewsday mercurye the wednesday Iupiter the thursday venus the fryday saturnus the saterday the holy sonday hath his name of the sonne whiche is the most fayr therfor the sonday is better than ony of the other dayes of the weke For this day is sette reseruyd from alle payne labour And on this day shold men doo thyngis that shold playse our lord but syth in this chapytre we haue touched of the firmament we shal speke after of somme caas that come on the heuen and therthe The sonday is as moche to saye as the daye of pees and of praysinge For the creatour of alle thynges cessed this day the whiche made and created all ¶ Of the meuyng and goyng aboute of the firmament of the sterres that ben therin Capitulo xxxii●o. ABoue saturne whiche is the last planete and hyest from vs of alle the vij planetes is the heuen that men see so full of sterres as it were sowen whan it is clere tyme and weder This heuen that is so sterryd is the firmament whiche meueth and goth round of whiche meuyng is so grete Ioye so grete melodye and so swete that ther is nomā that yf he myght here it that neuer after shold haue talente ne wylle to do thynge that were contrarye vnto our lord in ony thinge that myght be so moche shold he desire to come theder where he myght alleway here so swete melodyes and be alway wyth them wherrof somme were somtyme that saide that lytyl yonge children herde this melodye whan they lawghed in their slepe For it is said that thenne they here the angels of our lord in heuen synge wherof they haue suche Ioye in their slepe But herof knoweth noman the trouthe sauf god that knoweth all Whiche setted the sterres on the heuen and made them to haue suche power For ther is nothinge wythin the erthe ne wythin the see how dyuerse it be but it is on the heuen fygured and compassed by the sterres of whiche none knoweth the nombre sauf god only whiche at his playsir nombreth them knoweth the name of eueriche of them as he that alle knoweth and alle created by good reason at the regard of the sterres that may be seen they may be wel nombred and enquyred by Astronomye but it is a moche maystryse For ther ne is sterre so lytyl But that it hath in hym hole his vertue In herbe in flour or in fruyt be it in facion in colour or otherwyse Ther is nothing in erth that ought to be ne therin hath growyng but somme sterre hath strengthe and puyssaunce by nature is it good or otherwyse suche as god hath gyuen to it And for the firmament and for the planetes take this fygure to fore on that other syde and ye shal see therin the sytuacyon of them BVt syth we haue descriued and spoken of the firmament in this second partye of this volume we shal speke of somme caases that come and happen on hye and also lowe And shal speke of the mesure of the firmament For to vnder stande the better the facion and how it is made and proporcioned and of that whiche is aboue And also we shal speke of heuen ¶ Thus fynyssheth the seconde partie of this present volume ¶ Here beginneth the thirde parte of this present volume declareth first how the day the nyght come Ca. primo IN this thirde and last partye of this present booke we shal fynysshe it wyth spekynge of the faytes of Astronomye And I wyl declare to you first how the daye cometh and the nyght and for to make you vnderstande of the Ecplises And also for to vnderstande other thynges the whiche may moche prouffyte to them that wylle do payne to knowe them For to gouerne them the better after the disposicyon of the tyme ¶ Here declareth how the daye and nyght comen ¶ Why the sterres ben not seen by-day as wel as ay nyght ¶ Capitulo. ijo. THe sterres of the firmamēt on whiche the sonne rendreth clernes make contynuelly nyght day their tornyng cours wyth n firmamēt aboute roūd aboue as byneth But them that ben ouer vs we may not see by daye For the sonne by his grete clernes and lyght taketh from vs the sight of them In lyke wyse as ye shold do of candelis that were ferre brennyng from yow And yf ther were a grete fyre brennyng bytwene yow the cādellis had grete flawme lyght It shold take away fro yow your syght that ye shold not see the candellis yf the fyre were take away put byhynde yow ye shold incontynent see the candellis to fore you brennyng Thus in lyke wyse I saye yow of the sterres that may not be seen by daye as longe as the sonne maketh his torne and cours aboue therthe And whan the sonne is vnder therthe the sterres ben seen by vs But tho sterres that ben ouer vs in the somer on the day tyme in wynter they be ouer vs in the nyght for tho sterres that we see in the somer by nyght we may not see them on the day for the sonne that goth roūd aboute vs taketh fro tho sterres their clernes that ben on the day tyme where the sonne is vnto the tyme that he draweth hym vnder but all they be lyght what someuer part they torne as well by day as by nyght as longe as the sonne goth aboute hye