Selected quad for the lemma: cause_n

Word A	Word B	Word C	Word D	Occurrence	Frequency Band	MI	MI Band	Prominent
cause_n	aaron_n	moses_n	utter_a	50	3	13.7006	5	false

Text snippets containing the quad

ID	Title	Author	Corrected Date of Publication (TCP Date of Publication)	STC	Words	Pages
A14559	[Legenda aurea sanctorum, sive, Lombardica historia] [Wyllyam Caxton]; Legenda aurea. English. 1483	Jacobus, de Voragine, ca. 1229-1298.; Caxton, William, ca. 1422-1491.	1483 (1483)	STC 24873; ESTC S541	1,250,859	908

the voys of syngyng whan he approch●d to them he sawe the Calf and the instrumentis of myrthe and he was so wroth that he threwe doun the tables brake them atte fote of the hylle ran and raught doun the Calf that they had made and brente and smote it al to pouldre whiche he caste in to water and gaf it to drynke to the chyldren of Israhel Thenne said Moyses to Aaron What hath this peple don to the that thou hast made to synne greuously to whom he answerd late not my lord take none indignacion at me Thou knowest wel that this peple is prone and redy to synne They said to me Make to vs goddes that may goo tofore vs We knowe not what is fallen to this Moyses that lad vs out of egypte To whom I said who of you that hath gold geue it me they toke and gaf it to me And I Caste it in to the fire and therof cam out this Calf And thenne said moises Alle they that ben of goddis parte and haue not synned in this Calf late hem Ioyne to me And the chyldren of leui Ioyned to hym and bade eche mā take a swerd on his side and take vengeance and slee euerych his brother his frende and neygbour that haue trespaced And so the chyldren of leui wente and slewe xxxiijM of the children of Israhel And thenne said Moyses ye haue halowed this day your handes vnto our lord And ye shal be therfore blessyd The second day moyses spack to the peple and said ye haue commysed and don the grettest synne that may be I shal ascende vnto our lord agayn and shal praye hym for your synne Thenne Moyses ascended agayn and receyuyd afterward two tables agayn whiche our lord had hym make And therin our lord wrote the comandements And after our lord comanded hym to make an arke and a tabernacle In whiche arke was kepte thre thinges ¶ First the Rodde with whiche he dide meruaillis A potte ful of manna and the .ij. tables with the comandementis And thenne after Moyses taught hem the lawe how eche man shold behaue hym ayenst other and what he shold doo and what he shold not doo And departed them in xij tribus ¶ And comanded that euery man shold brynge a Rodde in to the tabernacle ¶ And Moyses wrote eche name on the Rodde And Moyses shytte fast the tabernacle And on the morn ther was founde one of the roddes that burgeyned bare leuys and fruyt And was of on almonde tree that Rodde fyl to Aaron And after thys longe tyme the chyldren desireden to ete flesshe remembrid of the flesshe that they ete in egypte And grudchyd agayn Moyses And wold haue ordeyned to them a duc for to haue retorned in to egypte Wherfore Moyses was so woo that he desired of our lord to delyure hym fro this lyf by cause he sawe them so vnkynde ayenst god thenne god sente to them so grete plente of curlews that two dayes and one nyght they flewe so thycke by the ground that they toke gete nombre For they flewhe but the heyhgt of two cubytes and they had so many that they dreyde hem hangyng on their tabernacles and tentes yet were they not content but euer grutchyng Wherfore god smote them toke vengeaūce on hem by a grete plaghe And many deyde and were buryed there And thenne fro thens they wente in to Aseroth and dwellyd After this Maria and Aaron brother and suster of moyses began to speke agayn moyses by cause of his wif whiche was of ethyope and said god hath not spoken only by Moyses hath he not also spokē to vs wherfore our lord was wroth Moyses was the humblest and mekest man that was in all the world Anone thenne our lord said to hym to Aaron and to marye Goo ye thre only vnto the tabernacle And there our lord said that ther was none lyke to Moyses to whom he had spoken mouth to mouth and repreuyd aaron and maria by cause they spack so to Moyses And beyng wroth departed fro them And anone maria was smeton and made lepre and whyte lyke snowe And whan Aaron behelde her and sawe her smeton with lepre he said to moyses I beseche the lord that thou sette not this synne on vs whiche we haue commysed folyly And late not this our suster be as a deed womā or as born out of tyme caste away from her moder beholde and see half her flesshe is deuoured of the lepre Thenne Moyses cryed vnto our lord sayeng I beseche the lord that thou hele her to whom our lord said yf her fader had spytte in her face shold she not be put to shame and Rebuke vij dayes late her departe out of the castellis vij dayes and after she shal be callyd in agayn So maria was shytte out of the castellis vij dayes the peple remeuyd not fro the place tyl she was callyd agayn After this our lord cōmanded Moyses to sende men in to the londe of canaan that he shold gyue thē charge for see and considere the goodnes therof And that of euery trybe he shold sende som̄e Moyses dyde soo as our lord had comaunded whiche wente in brought of the fruytee wyth hem and they brought a braunche with one clustre of grapes as moche as two mē myght bere bytwene them vpon a colestaf whan they had seen the contre consydered by the space of xl dayes thei retorned and tolde the commodytees of the londe but som̄e said that the peple were stronge and many kynges and gyauntes in suche wyse that they said it was imprenable and that the peple were moche strenger than they were wherfore the peple anon were aferde and murmured agayn moyses and wold retorne agayn in to egypte Thenne Iosue Chaleph whiche were two of them that had consydered the lōde said to the peple why grutche ye and wherof be ye aferd we haue wel seen the contrey and it is good to wynne the contrey floweth ful of mylke and hony be not rebelle ayenst god he shal gyue it vs be ye not aferd Thenne alle the peple cryed ayenst hem and whan they wold haue taken stones and stoned hem our lord in his glorye apperyd in a clowde vpon the coueryng of the tabernacle and said to Moyses thys peple byleueth not the sygnes and wondres that I haue shewd and don to hem I shal destroye them alle by pestylence And I shal make the a prynce vpon peple gretter strenger than this is Thenne prayd Moyses to our lord for the peple that he wold haue pyte on them and not destroye them but to haue mercy on them after the magnytude of his mercy And our lord at his request forgaf them Neuertheles our lord said that all tho men that had seen his mageste and the sygnes and meruaylles that he dyde in Egypte and in deserte and haue tempted hym ten tymes and not obeyed vnto his voys

mete and drynke bedde and fyre for to warme them in wynter In where someuer a place that he wente the suffretous and poure that ranne to hym fro al sydes folowed hym for al that he had was redy to theyr behofe as theyr owne He gave sudaryes for to burye wyth the dede bodyes and wyth his owne handes helpe to burye them a poure man ones came ageynst hym and he hauyng as thenne noo thynge redy to gyue hym took his hode and gafe it to the sayd poure man and yede home bare hede He chastysed hys flesshe moche sharpely for he was so accustomed to be in orysons and in prayers and to studye that the moste parte of the tyme he passyd wythout slepe bothe day and nyght yf he ne were sore trauaylled by ●tudye orysons or goeyng that he as constreyned must slepe and whan he must slepe he slepte on therthe and in stede of a pylowe he layed vnder hys heed somtyme hys book and somtyme a stone he ware euer the hayre vnder his sherte whyles that yet he was in the offyce of the offycyal in the cyte of tryguyer He vsed broune breed and podage suche as comunelye vsen poure labourers and none other mete he ne had and to hys drynk vsed colde water there lyned wyth suche mete drynke by the space of xj yere tyl he came to hys dethe he fasted enleuen lentes and al the aduentes of our lord and fro thascencion vnto pentycoste alle ymbre dayes alle vygyles of our lady and of the appostles and al other dayes stablysshed by holy chyrche for to faste he fastyd wyth breed and water And aboue alle thys duryng the xj yere aforesayd he fasted thre dayes in the weke wyth breed and water that is to wete wensday fryday satyrday and on the other dayes he ete also but ones a day and vsed breed potage suche as foloweth excepte the sondayes Crystemasday esterday whytsonday alhalowen day on whyche dayes he ete twyes his breed was rusty●al broun made of barleye or ootes hys podage was of grete cooles or of other herbys of beenys or of raddyss●e rote saueryd onelye with salte wythoute ony other lycour sauf that somtyme he put in it a lytel floure and a lytel buttyr and on esterday aboue his customed ●●●taunce he ete two egges He 〈◊〉 within the space of fourtene yere before hys dethe tastyd of noo wyne Sauf● onelye at masse after that he had taken the body and blood of our Lord or ellys somtyme whan he dyued with the bysshoppe for thenne wythin hys water he put a lytel wyne onelye for to chaunge the coloure he fasted ones by the space of seuen dayes wythout ony mete or drynke euer beyng in good helth The forsayd Saynt yues lyued fyfty yere or there aboute and in his laste sekenesse he tessyd not to teche theym that were aboute hym and prechyd vnto them of their salute and he comyng benewrelye vnto his laste dayes took humbly the sacramentes of the body of our Lord and laste vnccion lyeng on his noble bedde beforesayd adiousted alweye to the same with grete Instaunce of hys frendes a lytel strawe thre dayes before his dethe and his hood in stede of couerchyef aboute his heed had on his gowne and refusyng al other thynge he was couerd with a lytel and b●dde couerlette sayeng that he was not worthy to haue ony other paremente on hym The pure and clene thenne hauyng the hayr on his flesshe couerd wyth his sherte and yssueng oute of thys world in the yere of grace M thre hondred and thre the xix day of maye that was on the sonday after the assencion of our lord Ihesu cryste wente vp vnto heuen and lyke as he had ben a slepe without ony sygne or token of what someuer dolour he took the righte benewrous reste of dethe And who that coude recounte alle the myracles doon by hym how be it that to none ne is possyble but allonelye to hym whiche can nombre or telle the multytude of sterres and Imposeth to echone theyr names but by cause that to one right grete Inconuenyence and dyshonour were yf by slouthe refrayned hym self fro vtteryng and kepte stylle suche thynges that are apperteynen to the praysyng and laude of our lord and namely there as plente and baboundaunce of his praysyng is or shold be how be it that the sayd myracles are Infynyte or without ende neuerthelesse we shal reherce somme of them Thenne as it is recorded in the book longe sythe made and accomplysshed of his lyf of his vertues that at his Inuocacion by vowes and prayers by somme deuoutelye maad vnto god and to the saynt in dyuers places were fourtene deed reysed re●enyd alweye in the sayd nombre ij chyldren lyuyng within their moders wombe dede before theyr baptesmye whyche sythe receyued lyf and at the Inuocacion of the same saynt yues ten demonyakes madde folke or fylled with wycked spirites were delyuerd fro theyr foursenerye or madnesse and fro alle wycked spyrytes xiij contractes or fylled wyth paralysye were by the same restoryd in good helthe thre blynde were by hym enlumyned Dyuers folke in ten places wyth alle theyr goodes were kepte sauyd fro drownyng in the see ¶ One parfytelye ydropycke or fylled with dropsy was entyerly cured another that had the stone grete as an egge the genytoyrs as grete as a mannes heed was restytued vnto helthe One condempned to be hanged fyl thre tymes fro the galowes and al hole was delyuerd and lete goo A woman to whome the mylke wanted wythin hir pappes were fylled ful of hyt Thynges loste by dyuers persones and in dyuers places were founde and recouerd by myracles Two dombe chyldren and dyuers other that had loste the vse of the tongne were restytued of theyr spekyng Thre or foure wymmen with alle their byrthe were delyuerd fro the peryll of dethe The fyre taken and quenchyd in thre dyuer places was put out and bothe men wymmen chyldren good kepte fro brennyng wythoute to be hurted ne in no manere of wyse dommaged A woman s●re agreuyd with an axes toke a lytel breed that before had ben wette in water by the handes of the saynt ete it and recoueryd helthe The saynt hym self gyuyng foyson almoses the corne multeplyed in his garette and the breed in hys hande somtyme Many seek folke were heelyd yf dyuers sekenesse dolours onelye for to haue touched hys hood a man dressyng the whole of his water mylle on whome sodaynlye the water came fro hyghe ruysshyng and he besoughte the holy saynt yues and anone he was sauyd fro drownynge On a tyme as the sayd Saynt sayd masse whyle he celebred and helde vp the body of our lord a grete resplendour apperyd aboute it whyche soone after the leuacyon was doon dysapperyd and vanysshed aweye A poste ordeyned to the werkys or makyng of a brydge not couenable to the sayd werke for fawte of halfe