Selected quad for the lemma: cause_n

Word A	Word B	Word C	Word D	Occurrence	Frequency Band	MI	MI Band	Prominent
cause_n	aaron_n	moses_n	mourn_v	20	3	11.5594	5	false

Text snippets containing the quad

ID	Title	Author	Corrected Date of Publication (TCP Date of Publication)	STC	Words	Pages
A14559	[Legenda aurea sanctorum, sive, Lombardica historia] [Wyllyam Caxton]; Legenda aurea. English. 1483	Jacobus, de Voragine, ca. 1229-1298.; Caxton, William, ca. 1422-1491.	1483 (1483)	STC 24873; ESTC S541	1,250,859	908

the voys of syngyng whan he approch●d to them he sawe the Calf and the instrumentis of myrthe and he was so wroth that he threwe doun the tables brake them atte fote of the hylle ran and raught doun the Calf that they had made and brente and smote it al to pouldre whiche he caste in to water and gaf it to drynke to the chyldren of Israhel Thenne said Moyses to Aaron What hath this peple don to the that thou hast made to synne greuously to whom he answerd late not my lord take none indignacion at me Thou knowest wel that this peple is prone and redy to synne They said to me Make to vs goddes that may goo tofore vs We knowe not what is fallen to this Moyses that lad vs out of egypte To whom I said who of you that hath gold geue it me they toke and gaf it to me And I Caste it in to the fire and therof cam out this Calf And thenne said moises Alle they that ben of goddis parte and haue not synned in this Calf late hem Ioyne to me And the chyldren of leui Ioyned to hym and bade eche mā take a swerd on his side and take vengeance and slee euerych his brother his frende and neygbour that haue trespaced And so the chyldren of leui wente and slewe xxxiijM of the children of Israhel And thenne said Moyses ye haue halowed this day your handes vnto our lord And ye shal be therfore blessyd The second day moyses spack to the peple and said ye haue commysed and don the grettest synne that may be I shal ascende vnto our lord agayn and shal praye hym for your synne Thenne Moyses ascended agayn and receyuyd afterward two tables agayn whiche our lord had hym make And therin our lord wrote the comandements And after our lord comanded hym to make an arke and a tabernacle In whiche arke was kepte thre thinges ¶ First the Rodde with whiche he dide meruaillis A potte ful of manna and the .ij. tables with the comandementis And thenne after Moyses taught hem the lawe how eche man shold behaue hym ayenst other and what he shold doo and what he shold not doo And departed them in xij tribus ¶ And comanded that euery man shold brynge a Rodde in to the tabernacle ¶ And Moyses wrote eche name on the Rodde And Moyses shytte fast the tabernacle And on the morn ther was founde one of the roddes that burgeyned bare leuys and fruyt And was of on almonde tree that Rodde fyl to Aaron And after thys longe tyme the chyldren desireden to ete flesshe remembrid of the flesshe that they ete in egypte And grudchyd agayn Moyses And wold haue ordeyned to them a duc for to haue retorned in to egypte Wherfore Moyses was so woo that he desired of our lord to delyure hym fro this lyf by cause he sawe them so vnkynde ayenst god thenne god sente to them so grete plente of curlews that two dayes and one nyght they flewe so thycke by the ground that they toke gete nombre For they flewhe but the heyhgt of two cubytes and they had so many that they dreyde hem hangyng on their tabernacles and tentes yet were they not content but euer grutchyng Wherfore god smote them toke vengeaūce on hem by a grete plaghe And many deyde and were buryed there And thenne fro thens they wente in to Aseroth and dwellyd After this Maria and Aaron brother and suster of moyses began to speke agayn moyses by cause of his wif whiche was of ethyope and said god hath not spoken only by Moyses hath he not also spokē to vs wherfore our lord was wroth Moyses was the humblest and mekest man that was in all the world Anone thenne our lord said to hym to Aaron and to marye Goo ye thre only vnto the tabernacle And there our lord said that ther was none lyke to Moyses to whom he had spoken mouth to mouth and repreuyd aaron and maria by cause they spack so to Moyses And beyng wroth departed fro them And anone maria was smeton and made lepre and whyte lyke snowe And whan Aaron behelde her and sawe her smeton with lepre he said to moyses I beseche the lord that thou sette not this synne on vs whiche we haue commysed folyly And late not this our suster be as a deed womā or as born out of tyme caste away from her moder beholde and see half her flesshe is deuoured of the lepre Thenne Moyses cryed vnto our lord sayeng I beseche the lord that thou hele her to whom our lord said yf her fader had spytte in her face shold she not be put to shame and Rebuke vij dayes late her departe out of the castellis vij dayes and after she shal be callyd in agayn So maria was shytte out of the castellis vij dayes the peple remeuyd not fro the place tyl she was callyd agayn After this our lord cōmanded Moyses to sende men in to the londe of canaan that he shold gyue thē charge for see and considere the goodnes therof And that of euery trybe he shold sende som̄e Moyses dyde soo as our lord had comaunded whiche wente in brought of the fruytee wyth hem and they brought a braunche with one clustre of grapes as moche as two mē myght bere bytwene them vpon a colestaf whan they had seen the contre consydered by the space of xl dayes thei retorned and tolde the commodytees of the londe but som̄e said that the peple were stronge and many kynges and gyauntes in suche wyse that they said it was imprenable and that the peple were moche strenger than they were wherfore the peple anon were aferde and murmured agayn moyses and wold retorne agayn in to egypte Thenne Iosue Chaleph whiche were two of them that had consydered the lōde said to the peple why grutche ye and wherof be ye aferd we haue wel seen the contrey and it is good to wynne the contrey floweth ful of mylke and hony be not rebelle ayenst god he shal gyue it vs be ye not aferd Thenne alle the peple cryed ayenst hem and whan they wold haue taken stones and stoned hem our lord in his glorye apperyd in a clowde vpon the coueryng of the tabernacle and said to Moyses thys peple byleueth not the sygnes and wondres that I haue shewd and don to hem I shal destroye them alle by pestylence And I shal make the a prynce vpon peple gretter strenger than this is Thenne prayd Moyses to our lord for the peple that he wold haue pyte on them and not destroye them but to haue mercy on them after the magnytude of his mercy And our lord at his request forgaf them Neuertheles our lord said that all tho men that had seen his mageste and the sygnes and meruaylles that he dyde in Egypte and in deserte and haue tempted hym ten tymes and not obeyed vnto his voys

dore where as she sawe our sauyour Ihesu cryste with a grete multitude of aungellys whos beaute is Impossyble to be thoughte or wryton of erthely creature of whos syght this blessyd vyrgyne was fulfylled with so grete swetenesse that it can not be expressyd To whome our blessyd lady benygnely sayd Moste souerayn honour ioye and glorye be to you kynge of blysse my lord my god and my sone loo I haue brought here vnto your blessyd presence your humble seruaunte ancylle katheryne whiche for your loue hath refused al erthely thynges and hath at my sendyng obeyed to come hyther hopyng and trustyng to receyue that I promysed to hir Thenne our blessyd lord toke vp his moder and sayd moder that whiche pleseth you pleseth me and your desyre is myn For I desyre that she be knytte to me by maryage emonge al the virgynes of the erthe and sayd to hir katheryne come hyther to me and assone as she herde hym nempne hir name so grete a swettenes entred in to hir sowle that she was as al rauysshed therwyth our lord yafe to hir a newe strengthe which passyd nature said to hir come my spouse yeue to me your hande there our lord espoused hir in ioynyng hym self to hir by spirituel maryage promysyng euer to kepe hir in all hyr lyf in this world after this lyf to regne perpetuelly in his blysse in token of this set a rynge on hir fyngre which he commaūded hir to kepe in remēbraūce of this said drede ye not my dere spouse I shal not departe fro you but al weye comforte and strengthe you Thenne sayd this newe espouse o blessyd lord I thanke you with alle myn herte of alle your grete mercyes besechyng you souerayn lord to make me dygne and worthy to be thy seruaunte and handmayde and to plese you whome my herte loueth and desyreth aboue alle thynges and thus thys gloryous maryage was maad wherof al the celestyal courte ioyed and songen thys verce in heuen Sponsus amat sponsam saluator visitat illam wyth soo grete melodye that no herte may expresse ne thynke it Thys was a gloryous and synguler maryage to whiche was neuer none lyke before in erthe wherfore thys gloryous virgyne katheryne ought to be honowred lawded praysed emonge alle the vyrgynes that euer were in erthe and thenne our blessyd lord after this maryage sayd vnto the blessyd katheryne Now the tyme is come that I muste departe vnto the place that I came fro wherfore what that ye wyl desyre I am redy to graunte to you and after my departyng ye muste abyde here wyth olde adryan x dayes tyl ye be perfytely enformed in alle my lawes and wylle And whan ye shal be comen home ye shal fynde your moder deed but drede ye not for ye were neuer myssed there in al this tyme For I ordeyned there one in your stede that alle men wene it were your self and whan ye come home she that is there in your stede shal voyde Now fare wel my dere spouse and thenne she cryed wyth a ful pyteous voys A my souerayne lord god and al the ioye of my sowle haue euer mynde on me and wyth that he blessyd hir and vanysshed aweye from hir syght and thenne for sorowe of his departyng she fyl in a swowne so that she laye stylle a large houre wythout ony lyf and thenne was adryan a sory man and cryed vpon hir so longe that at the laste she came to hir self and reuyued lyfte vp hir eyen and sawe noo thynge aboute hir saufe an olde celle and the olde man adryan by hyr wepynge For al the ryalte was voyded bothe monasterye and paleys and al the comfortable syghtes that she had seen And specyally he whiche was cause of all hir ioye and comforte and thēne she sorowed morned and wepte vnto the tyme that she sawe the rynge on hir fyngre and for ioye therof yet she swowned and after she kyssed it a thousand sythes with many a pyteous tere and thenne adryan comforted hir the best wyse he couthe wyth many a blessyd exortacion and the blessyd virgyne katheryne toke al his comfortes and obeyed hym as to hyr fader and dwellyd with hym the tyme that our lord had assygned hir tyl she was suffycyently taughte al that was nedeful to hir and thenne she wente home to hir paleys and gouerned hir holyly in conuertyng many creatures to the cristen feythe of Ihesu cryste on whom al hir ioye was hooly sette and euer he was in hyr mynde so dwellyd stylle in hyr paleys neuer ydle but euer contynued in the seruyce of our lord ful of charite where a whyle I lete hir dwelle fulfylled of vertues and grace as the dere and synguler sponse of almyghty god And thenne in this mene tyme maxencyus that was thenne emperour and vycyous to goddes lawe and cruell tyraunte consyderyd the noble and ryal cyte of alysaunder and came thyder and assemblyd al the peple ryche poure for to make sacrefise to thydolles and the crysten men that wolde not make sacrefyse he lete slee this holy virgyne was at that tyme xviij yere of age dwellyng in hir paleys ful of rychesses and of seruauntes allone wythout parentes and kynne herde the brayeng and noyse of beestys the ioye that they made and songe and meruaylled what it myght be sente one of hir seruauntes hastelye to enquyre what it was and whan she knewe it she toke sōme of the peple of hir paleys garnysshed hyr with the signe of the crosse went thyder and fonde there many cristen men to be ledde to do sacrefyse for fere of dethe thēne was she strongely troubeled for sorowe and wente forthe hardely to the emperour and sayd in thys wyse And thenne demaunded they for what cause they were callyd from soo ferre partyes and the emperour answerd and sayd 〈…〉 a mayden none comparable to hyr in wytte and wysdom whyche confoundeth alle wyse men and she sayth that our goddes ben deuylles and yf ye surmounte hem by honoure I shall sende you ageyn in to your contreye wyth ioye And one of them had herof despyte and sayd by dysdayn thys is a worthy counceyl of an emperour that for one mayde yonge and fraylle he hath doon assemble so many sages and fro so ferre contrees and one of our clerkys or scolers may ouercome hyr and the kynge sayd to them I may wel by strengthe constreygne hyr to sacrefyse but I had leuer that she were ouercomen by your argumentes Thenne sayd they lete hyr be broughte tofore vs and whan she shal be ouercomen by folye she may knowe that she neuer sawe wyse man and whan the virgyn knewe the stryffe of the dysputacion that she abode She commaunded hir al vnto our lord and an aungel cam to hir and sayd that she shold kepe hir fermelye for she shold not be vaynquysshed but she