Selected quad for the lemma: cause_n

Word A	Word B	Word C	Word D	Occurrence	Frequency Band	MI	MI Band	Prominent
cause_n	aaron_n	lord_n	strive_v	12	3	9.3968	5	false

Text snippets containing the quad

ID	Title	Author	Corrected Date of Publication (TCP Date of Publication)	STC	Words	Pages
A14559	[Legenda aurea sanctorum, sive, Lombardica historia] [Wyllyam Caxton]; Legenda aurea. English. 1483	Jacobus, de Voragine, ca. 1229-1298.; Caxton, William, ca. 1422-1491.	1483 (1483)	STC 24873; ESTC S541	1,250,859	908

the voys of syngyng whan he approch●d to them he sawe the Calf and the instrumentis of myrthe and he was so wroth that he threwe doun the tables brake them atte fote of the hylle ran and raught doun the Calf that they had made and brente and smote it al to pouldre whiche he caste in to water and gaf it to drynke to the chyldren of Israhel Thenne said Moyses to Aaron What hath this peple don to the that thou hast made to synne greuously to whom he answerd late not my lord take none indignacion at me Thou knowest wel that this peple is prone and redy to synne They said to me Make to vs goddes that may goo tofore vs We knowe not what is fallen to this Moyses that lad vs out of egypte To whom I said who of you that hath gold geue it me they toke and gaf it to me And I Caste it in to the fire and therof cam out this Calf And thenne said moises Alle they that ben of goddis parte and haue not synned in this Calf late hem Ioyne to me And the chyldren of leui Ioyned to hym and bade eche mā take a swerd on his side and take vengeance and slee euerych his brother his frende and neygbour that haue trespaced And so the chyldren of leui wente and slewe xxxiijM of the children of Israhel And thenne said Moyses ye haue halowed this day your handes vnto our lord And ye shal be therfore blessyd The second day moyses spack to the peple and said ye haue commysed and don the grettest synne that may be I shal ascende vnto our lord agayn and shal praye hym for your synne Thenne Moyses ascended agayn and receyuyd afterward two tables agayn whiche our lord had hym make And therin our lord wrote the comandements And after our lord comanded hym to make an arke and a tabernacle In whiche arke was kepte thre thinges ¶ First the Rodde with whiche he dide meruaillis A potte ful of manna and the .ij. tables with the comandementis And thenne after Moyses taught hem the lawe how eche man shold behaue hym ayenst other and what he shold doo and what he shold not doo And departed them in xij tribus ¶ And comanded that euery man shold brynge a Rodde in to the tabernacle ¶ And Moyses wrote eche name on the Rodde And Moyses shytte fast the tabernacle And on the morn ther was founde one of the roddes that burgeyned bare leuys and fruyt And was of on almonde tree that Rodde fyl to Aaron And after thys longe tyme the chyldren desireden to ete flesshe remembrid of the flesshe that they ete in egypte And grudchyd agayn Moyses And wold haue ordeyned to them a duc for to haue retorned in to egypte Wherfore Moyses was so woo that he desired of our lord to delyure hym fro this lyf by cause he sawe them so vnkynde ayenst god thenne god sente to them so grete plente of curlews that two dayes and one nyght they flewe so thycke by the ground that they toke gete nombre For they flewhe but the heyhgt of two cubytes and they had so many that they dreyde hem hangyng on their tabernacles and tentes yet were they not content but euer grutchyng Wherfore god smote them toke vengeaūce on hem by a grete plaghe And many deyde and were buryed there And thenne fro thens they wente in to Aseroth and dwellyd After this Maria and Aaron brother and suster of moyses began to speke agayn moyses by cause of his wif whiche was of ethyope and said god hath not spoken only by Moyses hath he not also spokē to vs wherfore our lord was wroth Moyses was the humblest and mekest man that was in all the world Anone thenne our lord said to hym to Aaron and to marye Goo ye thre only vnto the tabernacle And there our lord said that ther was none lyke to Moyses to whom he had spoken mouth to mouth and repreuyd aaron and maria by cause they spack so to Moyses And beyng wroth departed fro them And anone maria was smeton and made lepre and whyte lyke snowe And whan Aaron behelde her and sawe her smeton with lepre he said to moyses I beseche the lord that thou sette not this synne on vs whiche we haue commysed folyly And late not this our suster be as a deed womā or as born out of tyme caste away from her moder beholde and see half her flesshe is deuoured of the lepre Thenne Moyses cryed vnto our lord sayeng I beseche the lord that thou hele her to whom our lord said yf her fader had spytte in her face shold she not be put to shame and Rebuke vij dayes late her departe out of the castellis vij dayes and after she shal be callyd in agayn So maria was shytte out of the castellis vij dayes the peple remeuyd not fro the place tyl she was callyd agayn After this our lord cōmanded Moyses to sende men in to the londe of canaan that he shold gyue thē charge for see and considere the goodnes therof And that of euery trybe he shold sende som̄e Moyses dyde soo as our lord had comaunded whiche wente in brought of the fruytee wyth hem and they brought a braunche with one clustre of grapes as moche as two mē myght bere bytwene them vpon a colestaf whan they had seen the contre consydered by the space of xl dayes thei retorned and tolde the commodytees of the londe but som̄e said that the peple were stronge and many kynges and gyauntes in suche wyse that they said it was imprenable and that the peple were moche strenger than they were wherfore the peple anon were aferde and murmured agayn moyses and wold retorne agayn in to egypte Thenne Iosue Chaleph whiche were two of them that had consydered the lōde said to the peple why grutche ye and wherof be ye aferd we haue wel seen the contrey and it is good to wynne the contrey floweth ful of mylke and hony be not rebelle ayenst god he shal gyue it vs be ye not aferd Thenne alle the peple cryed ayenst hem and whan they wold haue taken stones and stoned hem our lord in his glorye apperyd in a clowde vpon the coueryng of the tabernacle and said to Moyses thys peple byleueth not the sygnes and wondres that I haue shewd and don to hem I shal destroye them alle by pestylence And I shal make the a prynce vpon peple gretter strenger than this is Thenne prayd Moyses to our lord for the peple that he wold haue pyte on them and not destroye them but to haue mercy on them after the magnytude of his mercy And our lord at his request forgaf them Neuertheles our lord said that all tho men that had seen his mageste and the sygnes and meruaylles that he dyde in Egypte and in deserte and haue tempted hym ten tymes and not obeyed vnto his voys

haue it and the nonnes sayd they oughte to haue the body by cause he deyed there also by cause he was her founder and the monkes said they ought rather to haue hym by caust he was bothe theyr abbot and founder Thenne the chappytre of Powles and the people said they stroue in vayne for he shold be broughte to london in to his owne chirche thus ther was grete stryffe and at the laste they of london toke vp the holy body and bare it toward london and as they wente there fyl a grete tempeste and so moche water that they myght not passe but were constrayned to sette doun the corps in al the storme the tapers that were borne aboute the body were alweye bryght brennyng thenne the nōnes sayd that god shewyd wel that they of london ought not to haue hym by cause of the tempeste and atte laste after many wordes there was a clerke whyche had be longyng to saynt erkenwolde and sawe thys stryf and stode vp and commaunded scylence and tolde to the peple a grete commendacyon of the vertuous lyf of this holy saynt and sayd it was not honest ne accordyng to mysentrete the holy body by vyolente hondes but lete vs byseche almyghty god wyth good deuocyon and mekenesse of herte for to shewe to vs somme token by reuelacyon in what place this holy body shal reste and alle the people consented therto and knelyd doun and prayed deuoutelye and whyles they were in prayer they sawe that the water deuyded as it dyd to moyses in the reed see and to the chyldren goyng thorugh in to deserte In lyke wyse god gafe a drye path to the peple of london for to conueye thys holy body thorugh the water to the cytee and anone they toke vp the body with grete honoure and reuerence and by one assente they bare it thorugh the pathe the water stondyng vp on euery syde and the peple not wetyng theyr feet and so they came to stratforde and sette doun the bere in a fayre mede ful of floures and anone after the wedder began to wexe fayre and clere after the tempeste and the tapres were made to brenne wythout puttyng to fyre of ony mannes honde and thus it plesyd our lord for to multeplye myracles to thonour worshyp of this holy saynt wherfore the peple were full of ioye gladnes gaue lawde to almyghty god thenne they toke vp the body brought it to poules and as many seek folkes as touched his bere were made hole anone as they touched the bere of al their sekenesses by the merytes of the holy bisshop saynt Erkenwolde after they leyed buryed the body honourably in saynt Poules chirche where as our lord hath shewed many a fayr myracle as in delyueryng of prysoners out of theyr yrons seke folke to their helth blynde to their syght and lame men to their bodelye strengthe emonge al other he hath ben a special protectour to the sayd chirche ageynst fyre where on a tyme the chirche was brente and his shryne whiche was thenne but tre was sauyd thorugh his holy merytes in so moche that the clothe that laye vpon it was not perisshed Another tyme whan a grete fyre had brente a grete parte of the cyte shold haue entred vpon the chirche saynt erkenwolde was seen on the chirche with a baner fyghtyng ageynst the fyre so saued and kepte his chirche fro brennyng Thenne lete vs praye vnto this holy saynt that he be a special aduocate for vs to almyghty god that we may be preserued from al perylles of fyre water that he so gouerne vs bytwene welth aduersyre in this present lyf that we beyng assoyled from synne vyces may be brought vnto heuenly ioye where laude honour glorye be gyuen to the blessyd trynyte word wythouten ende amen Thus endeth the lyf of saynt Erkenwolde bysshop ¶ Here foloweth of the holy abbot Pastor and first of his name PAstor is said of fedyng by cause that he fedeth his shep and this holy man pastor fedde his sheep spyrytuelly and they were his brethern by spyrytuel wordes of doctryne and of maners of holy relygyon Of the holy abbot Pastor THe abbotte Pastor was many yeris in grete abstynence in deserte and tormēted his flesshe longe tyme and he shyned in grete holynesse of relygyon and hys moder desyred moche to see hym and his brethern and sawe on a day that he and his brethern went to the chirche they sawe hir and anone they fledde fro hir and entryd in to theyr celle shytte the dore ageynste hir and she came to the dore and satte there sore cryeng and wepyng And thenne pastor came to the dore and sayd what cryest thou there thou olde woman thenne she vnderstood the voys of hym and she cryed lowder and sayd I wold see you my sones why sholde I not see you am I not your moder that bare you and yaue you souke now am al hore for age To whome hir sone sayd whethyr wylt thou see vs in thys world or in another and thenne she sayd yf I see you not here shal I see you there and he said to hir yf thou mayst suffre not for to see vs here wythout doubte thou shalt see vs there whiche thenne departed ioyefully sayeng yf I shal see you there I wyl not see you here and thenne the Iuge wold nedes see the abbotte Pastor but he myght not and thenne he toke his susters sone as though he had been a malefactour and put hym in pryson and sayd yf pastor wyl come praye for hym I shal delyuer hym and lete hym goo and thenne the moder of the chylde came wepyng to the dore of pastor and prayed hym to helpe hir sone and whan she coude gete none answer of hym thenne she sayd to hym by grete vyolence yf thyn entraylles ben harde as yron and hast no pyte of nothynge yet at the leste oughtest thou to be moeuyd and haue pyte of thyn owne blood whiche is my sone and thenne pastor sent to hir and sayd that he had engendryd noo chylde And thenne anone she departed for angre and thenne sayd the Iuge atte leste lete hym commaunde by mowthe and I shal lete hym goo and thenne the abbotte pastor sente hym worde that he shold examyne the cause accordyng to the lawe and yf he were worthy to deye lete hym deye and yf not doo as it shal plese the He taughte hys brethern and sayd for to kepe hym self to consydere and to haue dyscrescyon ben werkys of the sowle pouerte trybulacion and dyscrescyon ben werkys of solytarye lyf It is wryton that thyse thre men were so Noe Iob and danyel Noe representeth the persone that possedeth Iob them that been troubled and danyel them that ben dyscrete yf a monke hateth two thynges he may be fre of thys world and one of his brethern asked hym what they